Ազգային ժողովում հարցուպատասխանի ժամանակ ՀՀ վարչապետի պաշտոնակատար Նիկոլ Փաշինյանը հայտարարեց, թե դեռ 2016 թվականին ՀՀ երրորդ նախագահ Սերժ Սարգսյանն ասել է, թե պատրաստ է Ղարաբաղի կեսը տալ` մյուս կեսի ինքնորոշմանը հասնելու համար, սակայն Ադրբեջանը մերժել է:

 

«Նոյյան Տապանի» թղթակցի փոխանցմամբ, ՀՀ վարչապետի պաշտոնակատարը նշեց. «Սերժ Սարգսյանը 2016 թվականի նոյեմբերի 17-ին «Ռոսիա» հեռուստաընկերությանը տված հարցազրույցում, որը հենց հիմա ցանկացած ոք կարող է յութուբում նայել, ասում է, որ իրենք պատրաստ էին 7 շրջանները հանձնել Ադրբեջանին, սակայն Ադրբեջանն ասում էր` ոչ, ավելին պետք է տաք: Դա ես չեմ ասում, Սերժ Սարգսյանն է ասում: Բայց ամեն անգամ Ադրբեջանն առաջ էր քաշում նոր պայմաններ:

 

Ես ավելին ասեմ, Սերժ Սարգսյանն ավելին էր տալիս Ադրբեջանին, Ղարաբաղի կեսն էլ էր տալիս Ադրբեջանին, սակայն Ադրբեջանն ասում էր ոչ: Ինչպե՞ս եմ հիմնավորում այս ասածը, շատ պարզ: Երբ նախորդ անգամ ԱԺ հարցուպատասպանի ժամանակ ես ասում էի, որ Սերժ Սարգսյանն օգտագործում է «բնակիչ» եզրույթը, արդյոք կարո՞ղ ենք եզրակացնել, որ նաև ԼՂԻՄ-ի ադրբեջանցի բնակիչները պիտի մասնակցեին այդ ենթադրվող հանրաքվեին: Ինձ զարմացրեց, որ հանրապետականներն էլի արձագանքեցին ու ասացին, որ Խորհրդային միության ժամանակ եղած չափով պետք է մասնակցեին: Ֆիքսենք սա: Բայց երկու սկզբունքային հարց կա.  ԽՍՀՄ տարիներին, եթե հավատանք մարդահամարին, ԼՂԻՄ-ում բնակվել է 40 հազար ադրբեջանցի, հիմա եթե այդ 40 հազար ադրբեջանցին, Սերժ Սարգսյանի ասածով, ստանում են ԼՂ բնակչի կարգավիճակ, ես հարց եմ տալիս, այդ բնակիչը որտե՞ղ պետք է բնակվեր:

 

Ես հղվելու եմ միայն իրենց ասածների վրա, որ չստացվի, թե բանակցային գործընթացի գաղտնիքներ եմ բացում: Այդ 40 հազար ադրբեջանցին որտե՞ղ էր բնակվելու: Կարո՞ղ եմ ենթադրել, որ նրանք բնակվելու են նույն տեղերում, ինչ բնակվել են մինչ այդ»,- ասաց Փաշինյանը: 

 

Նա նաև նկատեց` այդ 40 հազար ադրբեջանցին որ մասնակցեց հանրաքվեին 130 հազար հայի հետ, և 130 հազար հայն ինքնորոշվեց, այդ 40 հազար ադրբեջանից կարո՞ղ է ասել` գիտեք ինչ, ես էլ ունեմ ինքնորոշման իրավունք, ես էլ իմ հատվածում եմ ինքնորոշվում: Իսկ ինչպե՞ս է որոշվելու հանրաքվեի ադրյունքը: «Արդյո՞ք այն թղթում, որ իրենք պատրաստվում էին ստորագրել,  ձևակերպված էր, որտեղ է լինելու հանրաքվեն:  Ադրբեջանի մեկնաբանությունն այն է, որ հանրաքվեն պետք է լիներ Ադրբեջանի տարածքում»,- ասաց Փաշինյանը` հավելելով, որ նույնիսկ այդ տարբերակին Ադրբեջանն ասել է ոչ:

 

 

 

 

 

Նոյյան տապան   -   Քաղաքական