«Եվրոպական միությունը Հայաստանի կողքին է՝ շարունակելով աջակցել առողջապահական համակարգերի կարողությունների ամրապնդմանը։ Քովիդ-19 համավարակի ժամանակաշրջանում հանրային առողջապահության ոլորտի արտակարգ իրավիճակներին համարժեք արձագանք ապահովելը և մարդկանց կյանքը փրկելը կենսապես կարևոր է։ Միասին՝ մենք ավելի ուժեղ կլինենք և ավելի արագ կհաղթահարենք համավարակը», նշել է Հայաստանում ԵՄ դեսպան Անդրեա Վիկտորինը։

«Կորոնավիրուսով հիվանդ պացիենտների բուժօգնության կազմակերպման  համար յուրաքանչյուր ներդրում խիստ կարևոր է: ՀՀ կառավարությունը և առողջապահության նախարարությունն անում են ամեն բան` ապահովելու բուժման համար անհրաժեշտ սարքավորումներն, ինչպես նաև պատվաստանյութերի հասանելիությունը: Այս փուլում գնահատելի է նաև Եվրամիության, ՄԱԿ-ի և ԱՀԿ-ի աջակցությունը` հիվանդության կանխարգելմանն ուղղված միջոցառումների հարցում»,- նշել է Լենա Նանուշյանը: 

 

COVID-19-ի համավարակին ուղղված աջակցության շրջանակում ԵՄ-ն և ԱՀԿ-ի եվրոպական տարածաշրջանային գրասենյակը շարունակում են տրամադրել անհրաժեշտ բժշկական սարքավորումներ, ինչպես նաև տարբեր նախագծերի միջոցով նպաստել առողջապահական համակարգի հզորացմանը։ Ծրագրի շրջանակում ՀՀ առողջապահության նախարարությանն են տրամադրվել թթվածնի 200 խտացուցիչ, որոնք բաշխվել են Երևանում և մարզերում COVID-19-ով հիվանդներին սպասարկող հիվանդանոցներին։ 2021թ․ին Հայաստան են առաքվել ֆլյուրոսկոպիայի ստացիոնար 3 սարքավորում, որոնք ներկայումս տեղադրվում են Երևան, Գորիս և Մարտունի քաղաքների բժշկական կենտրոններում։

 

«COVID-19 համավարակի արձագանքման շրջանակում մենք կարևորում ենք բժշկական հաստատությունների վերազինումը համապատասխան սարքավորումներով, որոնց միջոցով հնարավոր կլինի փրկել հիվանդների կյանքը և տրամադրել համարժեք խնամք։ Ի հավելումն, մենք աշխատում ենք  բժշկական անձնակազմի կարողությունների հզորացման, ինչպես նաև COVID-19-ի ներհիվանդանոցային կառավարման ուղեցույցների մշակման ուղղությամբ:», - ավելացրեց ԱՀԿ ներկայացուցիչ Եգոր Զայցևը: